सभापति गगन थापाको संयोजकत्वमा कांग्रेसको १५औँ महाधिवेशन व्यवस्थापन समिति गठन

1k Shares

काठमाडौं । नेपाली कांग्रेसले आगामी १५औँ महाधिवेशन व्यवस्थापनका लागि सभापति गगनकुमार थापाको संयोजकत्वमा महाधिवेशन मूल व्यवस्थापन समिति गठन गरेको छ।

पार्टीको केन्द्रीय कार्यसमितिको बैठकले महाधिवेशनलाई व्यवस्थित र प्रभावकारी रूपमा सम्पन्न गर्न सभापति थापाको संयोजकत्वमा समिति गठन गर्ने निर्णय गरेको हो।

कांग्रेसले असोज १६ देखि १९ गतेसम्म काठमाडौंमा १५औँ महाधिवेशन गर्ने तयारी गरिरहेको छ। महाधिवेशनको तयारी तीव्र पार्दै पार्टीले विभिन्न जिम्मेवारी र समितिहरू गठन गर्न थालेको हो।

महाधिवेशन व्यवस्थापन समितिले अधिवेशनका लागि आवश्यक तयारी, समन्वय तथा व्यवस्थापनसम्बन्धी काम अघि बढाउनेछ। पार्टीका विभिन्न तह तथा निकायसँग समन्वय गर्दै महाधिवेशनलाई निर्धारित समयमै सम्पन्न गर्ने जिम्मेवारी समितिलाई दिइनेछ।

कांग्रेसले यसअघि महाधिवेशनका लागि प्रचार–प्रसार समिति, विधान संशोधन समिति लगायतका संरचना गठन गर्ने निर्णय गरिसकेको छ। महाधिवेशनमा सभापति थापाले मुख्य राजनीतिक प्रस्ताव पेस गर्ने तयारीसमेत गरिएको छ। कांग्रेसको १५औँ महाधिवेशनलाई पार्टीको आगामी राजनीतिक दिशा, संगठनात्मक सुधार र नेतृत्व चयनका दृष्टिले महत्वपूर्ण रूपमा हेरिएको छ।

सभापति गगन थापाले मुख्य राजनीतिक प्रस्ताव पेस गर्ने

नेपाली कांग्रेसको १५औँ महाधिवेशनमा पार्टी सभापति गगनकुमार थापाले मुख्य राजनीतिक प्रस्ताव पेस गर्ने भएका छन्। आगामी असोज १६ देखि १९ गतेसम्म काठमाडौंमा हुने महाधिवेशनमा थापाले ‘आगामी दशक, लोकतन्त्र र कांग्रेस’ विषयलाई केन्द्रमा राखेर मुख्य राजनीतिक प्रस्ताव प्रस्तुत गर्ने भएका हुन्।

कांग्रेस केन्द्रीय कार्यसमितिको बैठकले महाधिवेशनमा पेस गरिने विभिन्न प्रस्ताव र जिम्मेवारीसम्बन्धी निर्णय गरेको हो। बैठकको निर्णय सार्वजनिक गर्दै कांग्रेसले मुख्य राजनीतिक प्रस्ताव सभापति थापाले पेस गर्ने जनाएको छ।

त्यस्तै, उपसभापति विश्वप्रकाश शर्माले ‘राजनीतिक संस्कृतिमा क्षयको प्रवृत्ति र युगानुकूल रूपान्तरणको अभिभारा’ विषयक प्रस्ताव पेस गर्नेछन्। अर्का उपसभापति पुष्पा भुसालले प्रदेश निर्वाचन विशेष प्रस्ताव तथा महामन्त्री गुरुराज घिमिरेले संगठनसम्बन्धी प्रस्ताव महाधिवेशनमा प्रस्तुत गर्ने निर्णय भएको छ।

कांग्रेसले महाधिवेशनको प्रचार–प्रसारका लागि प्रवक्ता देवराज घिमिरेको संयोजकत्वमा प्रचार–प्रसार समिति समेत गठन गरेको छ। साथै पार्टी विधानलाई समयसापेक्ष बनाउँदै संगठनलाई थप प्रभावकारी बनाउन आवश्यक संशोधनको प्रस्ताव तयार पार्न महामन्त्री प्रदीप पौडेलको संयोजकत्वमा विधान संशोधन समिति गठन गर्ने निर्णय गरेको छ।

विधान संशोधन समितिलाई पार्टीका विभिन्न तह, निकाय तथा सदस्यबाट सुझाव संकलन गरी अध्ययन गर्न र आवश्यक संशोधनको प्रस्ताव केन्द्रीय कार्यसमितिमा पेस गर्न जिम्मेवारी दिइएको छ।

यससँगै कांग्रेसले आगामी महाधिवेशनबाट पार्टीको नीति, संगठन र समसामयिक राजनीतिक दिशाबारे नयाँ धारणा अघि सार्ने तयारी गरेको देखिएको छ। खासगरी सभापति थापाले पेस गर्ने ‘आगामी दशक, लोकतन्त्र र कांग्रेस’ केन्द्रित प्रस्तावलाई महाधिवेशनको प्रमुख राजनीतिक दस्तावेजका रूपमा हेरिएको छ।

 
 
सम्बन्धित समाचार