पेट्रोलियम आयातमा १६ प्रतिशत वृद्धि, १ खर्ब ८१ अर्बको कारोबार

2.1k Shares

वीरगञ्ज । चालु आर्थिक वर्षको पहिलो १० महिनामा वीरगञ्ज नाका हुँदै रू १ खर्ब ८१ अर्ब ७० करोड बराबरका विभिन्न छ प्रकारका पेट्रोलियम पदार्थ आयात भएका छन् ।

यो अघिल्लो आर्थिक वर्षको सोही अवधिको तुलनामा रू २५ अर्ब ५३ करोड अर्थात् १६.३५ प्रतिशतले बढी हो। गत आर्थिक वर्षको १० महिनामा यस नाकाबाट रू १ खर्ब ५६ अर्ब १७ करोड बराबरका पेट्रोलियम पदार्थ आयात भएका थिए ।

वीरगञ्ज भन्सार कार्यालयका सूचना अधिकारी उदयसिंह विष्टका अनुसार चालु आवको १० महिनामा पेट्रोलियम पदार्थ आयातबाट मात्र रू ६७ अर्ब १९ करोड राजस्व सङ्कलन भएको छ ।

डिजेल, पेट्रोल र एलपीजीको आयात विवरण

चालु आवको १० महिनामा मात्र रू १ खर्ब ५७ करोड मूल्य बराबरको ८ लाख ९५ हजार २४६ किलोलिटर डिजेल आयात भएको छ। गत आवको सोही अवधिमा भने कम मात्रामा डिजेल आयात भएको थियो ।

त्यस्तै, पेट्रोल आयात पनि बढेको छ। चालु आवमा रू ३५ अर्ब ७९ करोड मूल्य बराबरको ३ लाख ९० हजार ६१५ किलोलिटर पेट्रोल आयात भएको छ । गत आवको १० महिनामा रू ३१ अर्ब ७१ करोड मूल्य बराबरको ३ लाख ६७ हजार ३४४ किलोलिटर पेट्रोल आयात भएको थियो ।

तर एलपीजी ग्यासको आयात भने घटेको देखिन्छ । चालु आवमा रू २५ अर्ब ५४ करोड मूल्य बराबरको २४ करोड २७ लाख ३ हजार १५० किलोग्राम एलपीजी ग्यास आयात भएको छ ।

गत आवको सोही अवधिमा रू ३० अर्ब २८ करोड मूल्य बराबरको २६ करोड ४१ लाख १४ हजार ३२६ किलोग्राम एलपीजी ग्यास आयात भएको थियो ।

समग्रमा वीरगञ्ज नाका हुँदै पेट्रोलियम आयात र राजस्व सङ्कलन दुवैमा वृद्धि देखिएको छ भने एलपीजी ग्यास आयातमा भने गिरावट आएको तथ्याङ्कले देखाएको छ।

 
सम्बन्धित समाचार